لاہوریکم نومبر2007 ء جماعت اسلامی پاکستان کا اجتماع ارکان آج مورخہ2 نومبر کو ملتان روڈ پر شامکی بھٹیاں کے مقام پرشروع ہو گا ،جو 4 نومبر تک جاری رہے گا ۔ اس اجتماع میں ملک بھر سے جماعت اسلامی کے25 ہزار مردو خواتین رجسٹرڈ ارکان جماعت اور پانچ ہزار برادر تنظیموں کے ارکان شرکت کریں گے ۔ اجتماع کے انتظامات مکمل کر لیے گئے ہیں ۔ اجتماع کے لیے 6 فٹ اونچا 40 فٹ لمبا اور 22 فٹ چوڑا سٹیج تیار کیا گیاہے ۔ جس میں 100 افراد کے بیٹھنے کی گنجائش ہے ۔ 500 معذوراور بزرگ افراد کے لیے آرم دہ کرسیاں اور صوفہ سیٹ لگائے گئے ہیں اور وہیل چیئرز کا اہتمام کیا گیاہے ۔سٹیج کے ساتھ پریس گیلری بنائی گئی ہے ۔ 30 ہزار افراد کے بیٹھنے کے لیے وسیع پنڈال بنایا گیاہے ۔ اجتماع کے شرکا کی ضروریات کے مطابق تمام انتظامات کیے گئے ہیں ۔ قیام کے لیے ڈویژن کی بنیاد پر 16 قیام گاہیں بنائی گئی ہیں جن کے ساتھ چھ سو فلیش سسٹم ٹائلٹ بنائے گئے ہیں ۔ معذور افراد کے لیے کموڈ سسٹم خصوصی طور پر تیارکرائے گئے ہیں ۔ شرکا کے کھانے اور ناشتے کے لیے مطبخ قائم کیا گیاہے ۔ خواتین کے لیے نشست گاہ اور رہائش گاہوں کا الگ انتظام کیا گیاہے ۔ خواتین کے ساتھ آنے والے دو ہزار بچوں کے لیے پلے گراونڈ بنایا گیاہے جہاں ان کے کھیل وغیرہ کا سامان مہیا کیا گیاہے ۔ کھانے پینے کی اشیاءاور دیگر مصنوعات اور مکتبوں کے سٹال سج گئے ہیں۔ اجتماع گاہ کو روشن رکھنے کے لیے لائٹس کا اہتمام کیا گیاہے ۔ بجلی فیل ہونے کی صورت میں جنریٹر کا اہتمام کیا گیا ہے۔ پوری اجتماع گاہ میں جراثیم کش سپرے کیا گیاہے ۔ حزب المجاہدین کے ایک ہزار نوجوانوں نے سیکورٹی کے انتظامات سنبھال لیے ہیں۔
